Aşgabat «Dizaýn» ugry boýunça ÝUNESKO-nyň döredijilik şäherleriniň toruna girizildi

Aşgabat «Dizaýn» ugry boýunça ÝUNESKO-nyň döredijilik şäherleriniň toruna girizildi

Berkarar döwletiň täze eýýamynyň Galkynyşy döwrüniň her gününi göwün göteriji ajaýyp wakalar, hoş habarlar bezeýär. Hormatly Prezidentimiziň 2-nji noýabrda sanly ulgam arkaly geçiren Ministrler Kabinetiniň nobatdaky mejlisinde Aşgabat şäheriniň «Dizaýn» ugry boýunça ÝUNESKO-nyň döredijilik şäherleriniň toruna girizilendigi barada bu guramanyň Baş direktorynyň çözgüdiniň yglan edilendigi hakyndaky hoş habar hem tutuş halkymyzy buýsandyrdy.​

Türkmenistanyň Ministrler Kabinetiniň Başlygynyň degişli orunbasary, daşary işler ministri bular barada hasabat bermek bilen, şatlykly habaryň şu ýylyň 31-nji oktýabrynda Fransiýa Respublikasynyň Pariž şäherinde ýerleşýän Birleşen Milletler Guramasynyň Bilim, ylym we medeniýet meseleleri boýunça guramasynyň merkezi edarasyndan gelip gowşandygyny aýtdy.

Soňky ýyllarda biziň döwletimiz BMG-niň esasy düzümleriniň biri bolan ÝUNESKO bilen işjeň hyzmatdaşlygy alyp barýar. Gahryman Arkadagymyzyň başlangyjy bilen Aşgabady «Dizaýn» ugry boýunça ÝUNESKO-nyň döredijilik şäherleriniň toruna girizmek ugrundaky işe hem 2021-nji ýylda girişildi.

Ak mermer lybasly gözel Aşgabadyň «Dizaýn» ugry boýunça ÝUNESKO-nyň döredijilik şäherleriniň toruna girizilmegi Türkmenistanyň at gazanan arhitektory Gahryman Arkadagymyzyň köp ýyllarky tutanýerli zähmetiniň, ýurdumyzyň ýüregi gözel paýtagtymyzy dünýäniň iň owadan şäherleriniň birine öwürmek ugrundaky uly tagallasynyň miwesidir.

Jumageldi Begenjow

Türkmen döwlet binagärlik-gurluşyk institutynyñ talyby